Mae'n bleser gan CYDAG gyflwyno rhaglen 3 diwrnod 'Ein Llais Ni' a fydd yn cael ei gynnal yn Llandudno, Aberystwyth a Chaerdydd. Gwelir dyddiadau'r tri diwrnod isod:-
Llandudno - 14.10.25, 25.11.25, 4.2.26
Aberystwyth - 28.1.26, 12.3.26, 28.4.26
Caerdydd - 19.11.25, 21.1.26, 16.4.26
RHAGLEN 'EIN LLAIS NI YN Y DOSBARTH'
🟣 Ydych chi eisiau datblygu'ch dosbarth yn un sy'n tanio chwilfrydedd drwy drafodaethau ystyrlon, hybu meddwl beirniadol a dealltwriaeth ddofn?
🟣 Ydych chi'n teimlo bod angen meithrin hyder eich dysgwyr i siarad a chyfathrebu drwy'r Gymraeg?
🟣 Ydych chi'n chwilio am syniadau ymarferol i droi eich dosbarth yn gymuned sy’n siarad, gwrando ac yn dysgu gyda’i gilydd drwy gyd-destunau pwrpasol ar draws y cwricwlwm?
Mae Ein Llais Ni yn ddarpariaeth Dysgu Proffesiynol a chefnogaeth i arfogi athrawon ac arweinwyr ar draws y sector cynradd ac uwchradd. Mae wedi cael ei ariannu gan Lywodraeth Cymru a'i ddylunio gan arbenigwyr mewn partneriaeth gyda Phrifysgol Cymru Bangor. Ers dyddiau cynnar y prosiect yn 2021-22, mae bellach wedi datblygu'n raglen gynhwysfawr gyda gwefan sy'n benodol i ddatblygu llafaredd ar draws y cwricwlwm.
Mae'n rhoi lle blaenllaw i lafaredd Cymraeg er mwyn cefnogi ‘dysgu’ ar draws y cwricwlwm. Wrth i bob athro roi sylw bwriadus i lafaredd fe fydd yn galluogi cynnydd mewn hyder a lles dysgwyr, eu caniatáu i adeiladu perthynas â’u cyfoedion, a’u cefnogi i ddyfnhau eu dealltwriaeth ar draws y meysydd dysgu.
Cost am y 3 diwrnod yw £200 y person, neu £160 i aelodau. Bydd lluniaeth a chinio'n cael ei ddarparu ar y 3 diwrnod. Cofrestrwch drwy ddilyn y linc isod.
https://forms.office.com/e/vaJjJE2smd
TROSOLWG
Bydd y rhaglen yn addas ar gyfer pob athro, cynradd ac uwchradd ac yn canolbwyntio ar ddatblygu llafaredd Cymraeg ar draws y cwricwlwm
Dyma’r math o gynnwys sydd i’r rhaglen:
Diwrnod 1:
Deall pwysigrwydd llafaredd a sgiliau cyfathrebu a’u cyfraniad allweddol tuag at gyflawni’r pedwar diben
Cyfle i ddefnyddio adnodd ymarferol Ein Llais Ni i fyfyrio ar ansawdd darpariaeth a safonau llafaredd Cymraeg ar draws y cwrciwlwm
Defnyddio’r ‘4 Cam Athro’ a ‘Llafaredd Llwyddiannus’ i gefnogi addysgeg da a chynllunio profiadau siarad a gwrando Cymraeg cyfoethog
Cyflwyniad i’r strategaethau ac ymgyfarwyddo gyda’r wefan
Diwrnod 2:
Datblygu technegau trafod effeithiol mewn grŵp i godi hyder pob dysgwr wrth siarad a gwrando’n gydweithredol a datblygu rolau trafod
Cynllunio ar gyfer defnyddio dulliau digidol i ysgogi, cofnodi a chyflwyno tasgau llafar - asesu cynnydd
Dulliau ac adnoddau ar gyfer cynllunio a deall cynnydd mewn sgiliau siarad a gwrando
Diwrnod 3:
Strategaethau defnyddiol i ddatblygu geirfa er mwyn gwella sgiliau llythrennedd a dealltwriaeth ar draws y Meysydd Dysgu a Phrofiad
Cwestiynu effeithiol - datblygu sgiliau cwestiynu’r dysgwyr i annog chwilfrydedd, dyfnhau dealltwriaeth a chyfoethogi trafodaethau
Dod a pawb efo chi!! Adnoddau a chanllawiau ar gyfer hunanwerthuso ac arwain gwelliant drwy’r ysgol
Fe fydd disgwyl i bawb sy'n mynychu ddefnyddio gwybodaeth o’r diwrnod i gynllunio a threialu cyfleoedd ymarferol ar gyfer eu dosbarth i’w trafod yn ystod diwrnod 2 a 3.
Mae'r rhaglen hon yn ran o raglen ehangach o gyrsiau hyfforddiant a ddarperir gan dim Ein Llais Ni. Mae rhai cyrsiau yn cael eu darparu yn uniongyrchol i ysgolion drwy eu hawdurdodau lleol unigol. Gellir canfod gwybodaeth bellach am y ddarpariaeth honno drwy eich swyddogion ALl.